PUBLIC LIMITED LIABILITY COMPANY (OR JOINT STOCK COMPANY) # KỌ́ŃPÌNNÌ ÀTIJẸ̀BI ONÍGBÈDÉKE TARÁÀLÚ (TÀBÍ KỌ́ŃPÌNNÌ OWÓ-ÌDÓKÒWÒ ÀJODÁ)

*PUBLIC LIMITED LIABILITY COMPANY (OR JOINT STOCK COMPANY) # KỌ́ŃPÌNNÌ ÀTIJẸ̀BI ONÍGBÈDÉKE TARÁÀLÚ (TÀBÍ KỌ́ŃPÌNNÌ OWÓ-ÌDÓKÒWÒ ÀJODÁ)*

Oríkì: Kọ́ńpìnnì àtijẹ̀bi onígbèdéke taráàlú ni a lè kì, nípasẹ̀ àwọn oríkèé òfin rẹ̀, bíi èyí tí ó fàyè gba àwọn aráàlú láti kówólé àwọn ìpín-idókòwò rẹ̀, ó gbọ́dọ̀ ní ó kéré tán ẹni méje tí kò sì sí iye ẹni tó pọ̀jù tí a là sílẹ̀, ó fàyè gba àwọn ìpín-ìdókòwò náà láti ṣe í tàtaré, àti pé, orúkọ kọ́ńpìnnì àtijẹ̀bi onígbèdéke taráàlú náà gbọ́dọ̀ parí pẹ̀lú ìgékúrú “plc”.

Ọ̀rọ̀ “taráàlú” ni a máa ń lò láti túmọ̀ sí pé ẹnikẹ́ni nínú àwọn aráàlú ló ní òmìnira láti ra àwọn ìpin-ìdókòwò nínú òwò náà nígbà tí a bá polówó àwọn ìpín-ìdókòwò fún títà. Ní ti òdodo, àwọn aládàáni àti àwọn ìgbékalẹ̀ ló ni kọ́ńpìnnì àtijẹ̀bi onígbèdéke taráàlú.

Kọ́ńpìnnì àtijẹ̀bi onígbèdéke taráàlú tàbí kọ́ńpìnnì owó-ìdókòwò àjọdá jẹ́ ìgbékalẹ̀ abẹ́ òfin lọ́tọ̀. Lábẹ́ òfin a kà á kún pé ó ní ìdámọ̀ ti ara rẹ̀. Àwọn onípìn-ín-ìdókòwò kò lè dáhùn ní aláraẹni fún ohunkóhun tí a bá ṣe lórúkọ ìgbékalẹ̀ náà. Àwọn onípìn-ín-ìdókòwò náà sì tún máa ń jẹ̀gbádùn àtijẹ̀bi onígbèdéke.

Àpẹẹrẹ kọ́ńpìnnì àtijẹ̀bi onígbèdéke taráàlú ni Zenith Bank Plc, Guinness Nig Plc., First Bank Plc., Dunlop Nig. Plc., UTC Nig. Plc. àti Texaco Nig. Plc.

*Advantages of public limited liability company # Àwọn àǹfààní kọ́ńpìnnì àtijẹ̀bi onígbèdéke taráàlú*

(1) Legal entity # Ìgbékalẹ̀ abẹ́ òfin: Kọ́ńpìnnì àtijẹ̀bi onígbèdéke taráàlú ní bíbẹ lábẹ́ òfin. Ó ní ìláraẹni gedegbe yàtọ̀ sí àwọn olùni. Torínáà, ó lè peni lẹ́jọ́ tàbí kí á pè é lẹ́jọ́ lórúkọ ara rẹ̀.

(2) Perpetual existence # Bíbẹ títí: Ìtẹ̀síwájú wà nínú kọ́ńpìnnì owó-ìdókòwò àjọdá. Ikú tàbí ìkúrò onípìn-ín-ìdókòwò kan kò lè mú òpin bá òwò náà.

(3) Limited liability # Àtijẹ̀bi onígbèdéke: Àtijẹ̀bi rẹ̀ ní gbèdéke lórí iye tí a dókòwò gẹ́gẹ́ bí ojúowó sínú òwò náà; kò sí ìlapa lórí àwọn dúkìá aláraẹni.

(4) Large capital # Ojúowó gọbọi: Ó lágbára láti kó ojúowó tító jọ nípa títa àwọn ìpín-ìdókòwò tàbí ẹ̀rí-ìjẹnígbèsè (debentures) fún àwọn aráàlu.

(5) Transferability of shares # Àtiṣeétàtaré ìpín-ìdókòwò: Àwọn ìpín-ìdókòwò ṣe í tàtaré láì nípa lórí ìmúṣiṣẹ́ òwò náà.

(6) Loan facilities # Àwọn ìrọ̀rùn ẹ̀yáwó: Ọ̀pọ̀lọ́pọ̀ báńkì yàn láàyò láti máa fún àwọn kọ́ńpìnnǹ àtijẹ̀bi onígbèdéke taráàlú ní ẹ̀yáwó ju àwọn ìgbékalẹ̀ òwò yòókù nítorí pé kò sí bóyá ìkùnà láti sanwó padà.

(7) Economies of large-scale production # Ìṣọ́wóná ìgbéjáde olóṣùwọ̀n ńlá: Kọ́ńpìnnì àtijẹ̀bi onígbèdeke taráàlú ní ojúowó tó pọ̀ tó láti gbèrú, léyìí tí yóò yọrí sí ìgbéjáde yan̄turu níti àwọn ire. Nípa báyìí, ìṣọ́wóná yóò wà nínú ìgbéjáde.

(8) Democracy in management # Ìjọba-àwaarawa nínú ìdarí: Láti yan ìgbìmọ̀ àwọn apàṣẹ, àwọn onípìn-ín-ìdókòwò ní ẹ̀tọ́ láti dìbò fúnni tàbí kí á dìbò fún wọn ní ìpàdé alákòópọ̀ ọlọ́dọọdún.

(9) Owners are separated from management. # A ya àwọn olùni sọ́tọ̀ kúrò lára ìdarí.: Àwọn onípìn-ín-ìdókòwò ni a kà sí olùni kọ́ńpìnnì nígbàtí ìdarí wà lọ́wọ́ ìgbìmọ̀ àwọn apàṣẹ.

(10) Employees can become co-owners. # Àwọn òṣìṣẹ lè di alájọni.: Àwọn òṣìṣẹ́ lè di alájọni òwò náà nípa ríra àwọn ìpín-ìdókòwò ní kọ́ńpìnnì náà.

(11) Recruitment of experts: Gbígba àwọn ọ̀jìnmì síṣẹ́: Kọ́ńpìnnì owó-ìdókòwò àjọdá máa ń fa àwọn ènìyàn onímímọọ́ṣe àti alákọ̀ọ́mọ̀ mọ́ra láti ṣiṣẹ́ fún un.

(12) Research programmes # Àwọn ètò ìwádìí: Ní kọ́ńpìnnì owó-ìdókòwò, àǹfààní púpọ̀ síi máa ń wà láti gùn lé àwọn ètò ìwádìí.

*Disadvantages of public limited liability company # Àwọn àìláǹfààní kọ́ńpìnnì àtijẹ̀bi onígbèdéke taráàlú*

(1) Lack of privacy # Àìsí ìdákọ́ńkọ́: Kò sí ìdákọ́ńkọ́ nítorí pé kọ́ńpìnnì náà ní láti ṣe ìtẹ̀jáde àwọn àsùwọn àwòfín ọlọ́dọọdún rẹ̀ fún àwọn aráàlú.

(2) Conflict of interest # Ìkọlura ìfẹ́-ọkàn: Ìṣeéṣe wà fún ìkọlura ìfẹ́-ọkàn láàárín àwọn onípìn-ín-ìdókòwò, àwọn apàṣẹ àti àwọn òṣìṣẹ́, léyìí tó lè lapa lórí ìjáfáfá àwọn ìmúṣiṣẹ́ òwò náà.

(3) Slow decision making # Ìfalẹ̀ ṣíṣe ìpinnu: Ṣiṣe ìpinnu máa ń falẹ̀ nítorí ìfọ̀rọ̀lọ̀ àti ìjíròrò rẹpẹtẹ tó máa ń wáyé nínú ètò-onípòjipò ìdarí.

(4) Separation of owners from control # Ìyàsọ́tọ̀ àwọn olùni kúrò lára ìkójàánu: Àwọn olùni òwò náà (àwọn onípìn-ín-ìdókòwò) kò lẹ́nu púpọ̀ tàbí rárá nínú ìṣètò òwò náà, nígbà tó jẹ́ pé àwọn tó wà nídìí ìṣètò tí wọn kì í ṣe olùni lè má fi taratara ṣiṣẹ́ náà.

(5) Hard to establish # Ó ṣòro láti gbékalẹ̀: Àwọn ìrìn-àjò àti ọ̀fíntótó tó wà nínú ìforúkọsílẹ̀ ṣòro, ó sì díjú gidigidi.

(6) Payment of large corporate tax # Sísan owó-orí ti kọ́ńpìnnì gọbọi: A máa ń di àjàgà owó-orí tó wúwo lé wọn lórí, léyìí tó máa ń jẹyọ látara èrè tí wọ́n kéde.

(7) Lack of flexibility # Àìsí ìṣeétẹ̀: Kìkì òwò tí ó wà nínú abala èròńgbà ti àwòránti ẹgbẹ́ ni kọ́ńpìnnì náà lè ṣe. Kò lè dáwọ́le oríṣi òwò mìíràn.

(8) Decrease in personal interest # Àdínkù ìfẹ́-ọkàn aláraẹni: Irú ìfẹ́-ọkàn tí a máa ń fihàn nínú irú kọ́ńpìnnì yìí sábà máa ń kéré tí a bá fi wé ti ìjólùni ẹlẹ́nìkan níbi tí ìtara àti ìfẹ́-ọkàn ti ga gidigidi.

(9) Large capital requirement # Ìnílò ojúowó gọbọi: Ojúowó tí a nílò láti bẹ̀rẹ̀ àti láti mú kọ́ńpìnnì owó-ìdókòwò àjọdá ṣiṣẹ́ ló sábà máa ń tóbi gidi.

*~Hakeem O. Adeniyan, 15/1/2022*

+2347034251583

Search This Blog

Economics In Yoruba Language

PUBLIC LIMITED LIABILITY COMPANY (OR JOINT STOCK COMPANY) # KỌ́ŃPÌNNÌ ÀTIJẸ̀BI ONÍGBÈDÉKE TARÁÀLÚ (TÀBÍ KỌ́ŃPÌNNÌ OWÓ-ÌDÓKÒWÒ ÀJODÁ)

Comments

Post a Comment

Popular posts from this blog

MONEY EXPLAINED IN YORUBA LANGUAGE # OWÓ

COMMERCIAL BANKS # BÁŃKÌ KÁRÀKÁTÀ

AGRICULTURE # IṢẸ́-Ọ̀GBÌN

PUBLIC LIMITED LIABILITY COMPANY (OR JOINT STOCK COMPANY) # KỌ́ŃPÌNNÌ ÀTIJẸ̀BI ONÍGBÈDÉKE TARÁÀLÚ (TÀBÍ KỌ́ŃPÌNNÌ OWÓ-ÌDÓKÒWÒ ÀJODÁ)

Comments

Post a Comment

Popular posts from this blog

*MONEY EXPLAINED IN YORUBA LANGUAGE # OWÓ*

COMMERCIAL BANKS # BÁŃKÌ KÁRÀKÁTÀ

*AGRICULTURE # IṢẸ́-Ọ̀GBÌN*

MONEY EXPLAINED IN YORUBA LANGUAGE # OWÓ

AGRICULTURE # IṢẸ́-Ọ̀GBÌN